The Strokes--Someday

如果The Strokes唔算係一夜令七十年代復興爆發既樂隊, 咁起碼佢地都係呢個浪潮其中最重要既一員. New Wave Punk, 係一個古舊既音樂類型, 又係呢一刻令全世界趨之若鶩既潮流. 曲式短小, 有時lo-fi, 有時又可以精煉, 節奏急速迫人, 刺激, 爽朗, 反叛, 型格. 要玩得好, 玩得吸引人, 好難, 好容易會玩得膚淺單薄. The Strokes都有呢個過程, debut album完全係年少氣盛, 個性獨立, 歌係好簡單直接, 好lo-fi, 粗糙, 不過有一種年輕既衝勁, 活躍, 有力量. 我最鍾意呢一隻debut碟, 係帶我認識呢個scene既第一隻碟, punk得黎, 咁唔美國細路仔既! 你會愈來愈發覺我係先入為主既人. 去到第二隻碟好似想轉讓(起碼我自己覺得…), 但係變得好怪, 不倫不類, 好想試新野, 但係又擺脫唔黎以前, 12:51係證明, 雖然我好鍾意! 去到第三隻碟係我第二鍾意既, 開始想話俾人聽佢地都識得作曲編曲, 識得寫有結構既歌, 愈來愈成熟, 愈來愈豐富. 比較debut同第三隻碟既成長, 係幾得意既事.
今次要講既Someday, 係debut碟Is This It既歌. 內容都係好簡單, 不過我諗個個都會有, 就係講下平時偶爾會懷念以前年輕時開心既日子, 不論同朋友, 拍拖, 總之係生活. 又講下過去左既野唔會番轉頭, 係生活化既野. 其實呢隻碟多數都係年輕人內容, 講下女仔, 講下點樣頹廢, 而有另一隻New York City Cops就係特別有少少意識既. Someday既音樂底可以話, 完全無起乘轉合, 淨係明刀明槍, 單刀直入… …就係一段結他同bass不斷彈…(應該係, 你知我對耳架啦…大家自己聽下…)特別既係我鍾意個鼓擊, 好輕快, 好搖擺, 好佻皮, 節拍好細碎但係唔會鬆散. Vocal當然係保持一貫既庸懶, 少少唔同既可能係俾左些少力嗌, 佢令人疑惑處, 就係點解成日都可以hae唱成咁, 仲要hae得幾型!
呢隻歌既mv係一路播住隻歌, 一路成隊band同班朋友好多人落bar飲酒, 好似我希望既, 一大班人, 落pub落bar, 聽住鍾意既歌飲酒傾計聚舊. 係唔係又好似完全跟住隻歌? Haha我亦都係好受視覺影響既, 不過mv有幾多人可以拍得好丫? 係lo! 無啦, 再講唔到有咩其他野. 如果你要聽The Strokes, 我一定會叫你聽下debut隻碟先, Last Nite當然都好聽, 但係我一樣咁鍾意Someday. 由頭開始聽, 一開頭真係好raw好直接, 好熱血. 聽下慢慢點樣轉變, 點樣愈來愈深厚, 係幾得意既. 永遠唔變既係首歌一定完得好odd, odd到你無哂mood, odd到你苦笑.

預告:
The Strokes--Someday
Green Day--Warning warning時期既green day千祈唔好掂
Daft Punk--Digital Love
Korn--Twisted Transistor 少有正面既歌, 好新新plug既歌, 頭三隻碟必要聽(下次post番名)
Coldplay--Yellow 我記得有人問過我, 我仲記得係夜晚坐緊輕鐵, 唔記得係家肥定係阿賤, 問我, 咁樣都算係rock架? 我話係既, 之後唔識答佢.

The Verve--Bitter Sweet Symphony

我自己都有卒之講呢隻歌啦既感覺! 我曾經講過: (大概)如果要我揀一隻最英國, 最brit-pop既歌, 幾乎一定會係呢首! band未必係The Verve, 歌就一定會係. (唔知我再搵番更多黎聽時會唔會變) 呢隻歌一定係英國既, 無容置疑, 完全既英國味. 我覺得brit-pop係多重性格, 唔止一面既, 但係一定有一份沉鬱. Blur有時好搞鬼, Coldplay更加內向, Oasis反叛, 我會話The Verve有一份書卷味, 但係全部都係性格沉鬱既.
可能都係先入為主, 係帶我走向世界既band, 係最初期衝擊我既歌, 呢首歌對我黎講都係與別不同既, 其他人可能覺得有更好既歌, 不過都係我既感情問題. 呢首歌用左好多弦樂, 我都知, 幾首歌我都講佢用左弦樂, 不過係用得好我先講既. 不斷重複一段好宏偉, 壯觀既melody, 感覺好似朝聖時一樣. 但係好似The Verve解散之後, vocal Richard Ashcroft既solo碟愈玩愈大陣仗, 要華麗有華麗, 要精美有精美, 不過唔好聽. 呢首歌既弦樂係令你感動, 震撼你一類, 我唔識得講玩到點樣好, 玩到點樣有技巧, 不過係你會覺得唔係普通野, 唔係普通人玩得到既.
Bitter Sweet Symphony係我接觸The Verve既第一首歌, 之後你慢慢睇我寫既歌, 就會計到我算接觸外國野係幾時開始, 係好多野都過左既時代, 都算遲. 我即刻講得出口既歌仲有係Sonnet, The Drugs Don’t Work, 可能我真係比較鍾意Urban Hymns呢隻碟, A Northern Soul當然唔係唔好, 不過我唔係聽過好多次, 要花時間再聽真下! Haha!
首歌既mv都係好值得睇, Ashcroft沿住街邊一路行, 一路唔停咁行, 撞散哂路上面其他人既野, 撞低左個女人, 去到路口有車又跳上人地架車既引擎蓋跨過去. 第一次睇真係心諗駛唔駛呀, 唔覺得好型, 覺得幾好笑! 歌詞應該係講緊人生, 講緊自己. You’re a slave to the money then you die都係呢一類歌詞. 仲有就係I can’t change my mold, 不斷唱, 可能有少少怪既人都會係咁, 等其他人去適應. 呢篇寫得唔好, 感覺好強烈, 但係諗唔到寫咩野, 可以既話, 聽下隻歌, The Verve唔止我講既咁少野.

The Smashing Pumpkins--1979

The Smashing Pumpkins究竟有咩野咁吸引我? 經過百般思考同百般討論之後, 我都係無解. Pumpkins係年輕時帶領我”邁向”世界既其中幾隊band之一, 例如仲有The Verve, Blur, Green Day, Travis等. 我接觸Pumpkins時已經唔係佢地Grunge既時期, 起碼我覺得佢地已經唔係Grunge, 係去到Ava Adore既時期. 當然我好鍾意Siva, Drown, Perfect, Tonight Tonight等等既歌, 1979應該都係差唔多時期. Pumpkins對我而言係有少少情意結, 但係我覺得流行曲係應該要去到呢一個水平既. 我好多時對好band都會醒起呢個諗法, 如果我將Pumpkins同流行曲連埋, 可能會有路過既人鬧我. 不過Pumpkins去到後期, 臨拆夥之前, 玩緊咩大家有聽過既都有個譜, 但係如果講流行曲, 就應該起碼有呢個水平.
Pumpkins都係好識得用弦樂既band, 如果佢地要做既話, 一首簡單既歌會平添一份壯麗或憂鬱, 並唔係普通樂隊能夠做到既. Pumpkins既guitar同bass都好特別, 呢兩件野完全負責歌入面龐大既音牆, 抑鬱既氣氛. 但係guitar James Iha既solo碟清新可喜, 好似重新投入番呢個社會. 我可以講其實都係呢隻solo碟令我更加喜愛Pumpkins. 而兩代Pumpkins既bass都係女人, 呢兩個女人比好多男人更dark更深邃. 我唔係聽過Pumpkins好多歌, 我係衰在鍾意既都好想聽下, 但係每隊都聽少少. 我會話, 後來既Pumpkins寫既歌好好聽, 嘈既ballad既melody都好靚, 但係每首歌爭好遠. 以前隻隻歌都有特色, 都值得聽, 整體好好, 無一首特別突出.
每一隊我剛剛聽既band都有某幾首打動我既歌, 覺得”就係呢樣啦”, 1979就係Pumpkins其中一首. (Ava Adore就令我覺得”好型呀”!) 我記得我曾經計番1979同出廠年份, 可能係講緊18歲, 但係我睇過歌詞又好似唔係… 可能我睇唔明, to see that we don't care to shake these zipper blues/and we don't know just where our bones will rest/to dust I guess/forgotten and absorbed/into the earth below/the street heats the urgency of sound/as you can see there's no one around 而呢種對未來既無助徬徨都係有既. 同埋令我有呢種諗法係因為1979個mv, 講一班年輕人揸住架車周圍飛周圍玩, 香口膠亂丟, 女仔亂撩, 架車就亂撞, 周圍去周圍癲, 生活極頹廢. 而Billy Corgan(vocal)就坐到好高唱呢隻歌, 十足十講番自己年輕時既輕狂歲月咁, 又好似講緊年輕就一定糜爛癲狂咁. 音樂底呢隻歌就普普通通, guitar同bass都係不斷彈住一段loop, 少少變化, 無guitar solo, 鼓都唔係複雜既pattern. 但係感覺好urban, 係身處urban呢類, 所有人同事不斷向身後消失, 不斷穿州過省, 可能我俾個mv影響到, 而且我隻耳仔都唔係好靈既… … 歌曲同歌詞好夾, mv就拍左個影像出黎. Smashing Pumpkins係大band, 賣得錢, 可能好多人會覺得普普通通無咩野, 我都覺, 可能因為已經過左佢地驚為天人既時代. 佢地已經重組, 重新做歌一段時間, 係唔係以前既感覺唔重要, 分開又重組之後我希望聽到新野但係驚喜.

The Stone Roses--Elephant Stone

05年自修左大半年, 有好多唔同既得著, 包括識到好多好朋友, 重新認識自己等等.(希望遲下加多一個degree.)而搵到Stone Roses黎聽, 絕對係其中之一. 可能會有路過既人睇到, 或者聽野比較耐既人會話, 嘩Stone Roses好勁架當年, 你咁耐先講既. 係呀我到佢地散左好耐都未識… 到Ian Brown出左幾隻碟都未識… haha… 的確, 組成於八十年代末期既Stone Roses有非比尋常既歷史意義. 可以話一手了結左英國整個八十年代已經疲弱, 老化諸如The Smiths既guitar-rock潮流. 並直接激起九十年代初既曼徹斯特狂熱(Madchester), 甚至影響後來一眾早期既brit –pop樂隊.(Oasis既Noel Gallagher就係因為聽完Stone Roses既live, 而萌起組Oasis既念頭.)
咁Stone Roses究竟係玩咩野既呢? 有好多種講法. 我覺得係guitar-pop與少少迷幻之間. 我咁鍾意既最大原因係, 佢地好識得寫好聽既melody, 而且經典, 過左二十年到依家都仲好聽. 好識得用結他, 有好豐富既變化, 通常一首歌支結他就好似solo左整首歌, 以結他為骨幹帶起成首歌. Stone Roses唔係一隊好複雜既樂隊, 調子流麗舒暢, 悅耳動人, 不過豐富(唔知應唔應該講編曲), 每一部分都有發揮空間; 歌詞都好簡單, 單純, 講下好鍾意, 好掛住女朋友, 或者個女仔好吸引人. 我想講既係, 做音樂, 做一首歌有時唔駛好修飾, 好大堆頭. 當然講究編曲既post-rock或某些電音一類就唔同, 但係要考驗實力. 人地兩支結他一支bass一套鼓, 可以玩guitar-pop玩迷幻玩跳舞音樂, 而且玩起黎經得起時間考驗, 歷久不衰. 音樂人對音樂, 一首歌於音樂上既創造創新, 就算如何簡單, 都係佢個人獨特既體現, 無其他人能夠相比. 唱功可以練, 可以練到一定水準, 但係始終有人功力比你高, 而對音樂既獨特創造性始終唔能夠比較.
講番呢首歌, Elephant Stone係Stone Roses於1988年推出既第三隻single, 風格爽朗, 鼓擊有電子跳舞音樂味道, 但係因為太過跳舞音樂而無擺落debut album入面. 我揀呢隻歌既原因, 係由超過分半鐘既intro開始, 到唱歌入, 到outro, 前後兩支結他互有高低, 互換主導地位彈奏. 令成首歌節奏緊湊, 好似係互相較勁, 但係又相輔相成. Melody寫得非常活潑, 令人有立刻跟拍子搖擺跳舞既衝動. 佢地係一支好識得寫歌既樂隊, 呢首歌都係兩支結他, 但係豐富, 吸引到你不斷聽, 而且每次都有新發現. 呢首歌唔係最Stone Roses既歌, 太過活躍, 太過綺麗, 但係我覺得最能夠體現佢地既特性同功力. 最後就係, 我用左好多字都寫唔出呢首歌究竟有幾好聽! 好想你都聽下.
其他Stone Roses值得聽既歌:
I wanna be adored.
She bangs the drums.
Ten storey love song. (Stone Roses迷溝女必備歌!)
Waterfall.
Made of stone.
Sally Cinamon. (令大家諗起自己個sally!)
Begging you.
必睇網頁, 資料來源: http://www.geocities.com/chungwanfei/stone.html 一位香港Stone Roses迷, 好得!!!

Puff Daddy feat. Faith Evans, 112--I’ll be missing you

如果要介紹hip hop, 呢隻唔係最好既選擇, 遲下或者我會再講好選擇, 不過呢隻就係其中一隻最影響到我既, 不過係因為細個, 係有少少幼稚既.
最初我睇mtv聽到呢隻歌, 又買左Puff Daddy隻No Way Out, 入面都有呢隻歌, 係寫黎紀念佢被鎗殺既老友The Notorious Big既. 要講點解biggie會被人射死, 就要講埋同佢之前都係老友, 但係之後反目成仇, 最後又被人射死左既Tupac, 仲要講埋東西岸幫派火拼, 成匹布咁長, 都係唔駛講. 我只係要講, 依家如果你睇到雜誌寫黑人rapper打打殺殺點點點, 又咁咁咁, 仲自己加埋無知評論, 係太過膚淺, 諗得太簡單. 報紙都還好, 淨係當報導每一件事. 佢地無一個唔係幫派份子, 無一個唔係”高層”, 如果你要扮識得佢地既野, 係無謂同幼稚. 我覺得聽落覺得好聽, 識得揀真係好聽既野黎聽就夠.
講番隻歌, 曾經令我耳目一新. 呢隻歌sample自八十年代樂隊The Police(中堅成員係依家都仲活躍樂壇既Sting)既名曲Every Breathe You Take, 講真, 當時我真係無諗過, 無見識過一隻歌既音樂底係可以咁樣做出黎既. 拎左另一隻歌既一段出黎, 加下適量既鼓擊, 適量地加減修補, 就成為一個beat, 寫一首rap出黎. 雖然後來我睇過一本hip hop天書Hip Hop America(by Nelson George), 知道呢個整beat方法歷史攸久, 又聽到過唔夾beat都可以sample到, 又聽過好多更加好聽既beat, 不過呢隻歌對我黎講係有少少歷史意義. 不妨搵齊兩隻前後夾住聽, 會幾得意. 香港都愈來愈多所謂監制同作曲會咁樣做歌, 不過我想講, 人地每個sample都俾足版權錢, 係買到人地同意既, 唔該負番呢個責任. 陳冠希既香港地同Tupac既To Live and Die In LA係好例子, 將兩首歌寫埋一齊真係令我好羞恥, 不過在於似乎有人從來都無提過佢”sample” To Live and In LA既情況下, 我都成日講, 因為係對香港呢個地方既見證.
歌詞都係講下P Diddy對Biggie既懷念, 因為有人同我講過rap未必係佢地自己寫番, 所以都係聽下就算, 同埋rap寫得好唔好, 唔係rhyme就ok, 仲要聽下個flow.(只可意會… 不能言傳…) 我覺得呢隻都算ok既, 幾fluent, 都係有人同我講過, 聽番黎.
Puff Daddy值唔值得聽? 我覺得麻麻, 好pop, 我覺得佢係新一代hip hop愈來愈pop既開端. 如果要聽, 聽Biggie就最好, 好識得寫rap, rap入面既flow好fluent又有變化. 其實對於聽hip hop我唔係呢個世代既人, 我好九十年代, 少少八十年代. 我會叫你聽Biggie, Tupac, Big Pun, Fat Joe, Jay-Z, Nas, Ice Cube, Wu Tang Clan眾人等等, 唔會叫你聽50 cent, Eminem, Kanye West, The Game等等, 因為… 純粹係好聽同唔好聽既分別. 佢地好多都已經被殺, 已死, 或者唔死都半退狀態, 但都係佢地比較好聽, 我唔知係咪因為我老, 應該都係佢地真係比較勁既關係.

The Beatles--The Long and Winding Road

如果要我揀一隊band介紹俾人聽, 第一隊我一定會揀beatles. 如果要我介紹一首beatles既歌俾人聽, 我一定會揀The Long and Winding Road.
相信好多人都會聽過The Beatles, 聽過佢地既歌. (容許我講一句, 如果你識得我, 又唔識得披頭, 請你以後唔好再搵我, 再見.) 我諗比較多人聽過既係佢地初出道時, 翻唱下舊歌, 唱下追女仔既歌. 例如I Wand To Hold Your Hand, She Loves You等等. (阿爸年代電台點唱溝女必點歌!) 佢地由唱下口水歌開始, 逐漸玩下實驗, 玩下迷幻, 玩下印度野, 玩下LSD, 玩左好多唔同既野. 到披頭末期, 適逢越戰爆發, 其實都可以話全世界都唔知越戰幾時打完, 卒之令佢地創作出佢地自己既反戰歌.
披頭最後兩隻碟或多或少都充斥住些許反戰意味, 我唔係好了解, 唔知道係唔係有好多, 但係就絕對唔可以話無. 收錄於大碟Let It Be既The Long and Winding Road我覺得係佢地呢個意識形態既代表. 唔… …其實我都講唔出呢首歌既歷史同背景, 關於呢首歌既野, 以後講其他歌可能都唔得. 我想講下既或者只係呢首歌同我生活既關係, 呢首歌能夠帶俾我既感受. (係咪好似依家香港既所謂歌星講既野?!!) 可能呢個都係我開始寫呢個blog既原因. 講下故仔先.
其實係因為我阿爸, 後生都聽下英文歌, 先令我有幸脫離香港呢個好似維多利亞港咁細既音樂世界. The Long and Winding Road我好早就聽過, 當時驚覺弦樂同rock band既音樂竟然可以咁夾. 但係歌詞既意思就睇極都唔明, 亦唔知原來披頭四個人都好唔鍾意後期加左弦樂, 所以聽完好鍾意就算. 首歌開頭係, Paul McCartney先清唱一句歌名, 然後弦樂就入, 其他野就跟住入. 去到末段有一小段弦樂演奏, 加上又以弦樂結尾, 震撼力難以筆墨形容. 歌詞就重複大意為Many times I've been alone and many times I've cried./ Anyway you'll never know the many ways I've tried, but/Still they lead me back to the long and winding road/You left me standing here a long, long time ago/Don't leave me waiting here, lead me to you door. 到依家都唔係好睇得明.
到幾年前, 一個港台製作既電視節目用左呢首歌, 提昇左呢首歌對我既意義, 呢個節目就係頭條新聞. 我記得當年阿拉法特仲未死, 沙龍仲未中風, 以色列都未撤出西岸, 當年係二零零零年後以巴衝突既高峰. 頭條新聞用左呢隻歌, 剪左一段片講以巴衝突既歷史. 當中穿插住七十年代以美國為首既以巴和談黑白片, 由車箱影出去一架車穿過一條吊索橋既黑白片, 同埋當時近期既以巴衝突中, 應該係以軍同巴勒斯坦游擊隊駁火, 一對父子無端被困於當中, 最後雙雙被擊斃既畫面. (應該有更多唔同既footage, 不過唔記得.)
我相信呢段片帶俾我既震撼力相對大於首歌, 但係我知道無第二首歌更適合呢條片. 由幾百年前部族, 宗教間既衝突, 到六七十年代夾雜住愈來愈激烈既戰爭與和談, 到二千年都仲有無數平民被子彈炮火殺死. Anyway you'll never know the many ways I've tried, but/Still they lead me back to the long and winding road 既意思我諗我逐漸開始明白. 頭條新聞cut左一段段播對父子被困既過程, 父親曾經揮手示意佢地被困, 請佢地停火. 但係最終佢地都係死左, 幾百年黎促進以巴和平既人都相繼死去, 無數既以巴人民都相繼死去, 呢對父子, 呢首歌, 相信就係講緊呢樣野. 頭條新聞剪呢段片剪得好, 用呢隻歌用得好, 披頭寫到呢隻歌仲寫得好.
我相信打仗如果唔會死人, 打仗係其中一個適合解決問題既方法, 但係打仗又點會唔死人呢. 我應該係反戰人士, 可能係, 如果你愈來愈對打仗無感覺, 請你聽下呢首歌.
(PS. 話說原來披頭四個人都唔鍾意後期弦樂既overdubbed, 雖則我覺得幾好聽haha. 依家每次Paul McCartney自己既live都會玩番呢隻歌, 但係佢就用左好多鋼琴, 係另一種好聽!)